एमाले विराटनगर उपमेयरकी उम्मेदवारविरुद्ध उजुरी

विराटनगर- विराटनगर महानगरपालिका एमालेकी उपमेयर उम्मेदवार शिल्पा निराला कार्कीसहित तीन जना महिला वडासदस्य विरुद्ध उजुरी परेको छ। 

सोमबार मनोनयन दर्ता गराएकी कार्की कोशी अस्पताल विकास समितिको सदस्य रहेको दाबीसहित दलीय गठबन्धनतर्फ जसपाका उपमेयर अमरेन्द्र यादवले उजुरी दिएको मुख्य निर्वाचन अधिकृतको कार्यालयका सूचना अधिकारी हेमबहादुर बुढाथोकीले बताए। उनका अनुसार  कार्कीसँगै अन्य तीन जना महिला वडा सदस्यविरुद्ध पनि उजुरी परेको छ। 

उजुरीका विषयमा आवश्यक जाँचबुझ गर्ने र निर्णय हुने मुख्य निर्वाचन अधिकृत भरत लम्सालले बताए। कार्कीले मंगलबार पदबाट राजीनामा लागि निवेदनसहित अस्पताल पुगेको कोशी अस्पतालका मेडिकल सुपरिटेन्डेन्ट डा. यज्ञ खरेलले बताए। 

मेसु डा. खरेलले कार्की अस्पताल विकास समितिको सदस्य रहेको बताएका छन्। सदस्य कार्कीले अस्पताल विकास समितिबाट बैठक भत्ता र सुविधा लिने गरेको बताएका छन्। 

निर्वाचन अधिकृतको कार्यालयमा वडा नम्बर ८ मा दुई महिला सदस्यका उम्मेदवार र वडा नम्बर १३ मा एक महिला सदस्य विरुद्ध उजुरी परेको छ। 

वडा नम्बर ८ बाट मनोनयन दर्ता गराएकी गीता मुखिया र सुशीला सहनीविरुद्ध दलित नभएको उजुरी परेको हो। वडा नम्बर १३ मा गौरीकुमारी वैश्यविरुद्ध भने अदालतले तोकेको जरिवाना नतिरेको विषयमा उजुरी परेको कार्यालयका सूचना अधिकारी बुढाथोकीले जानकारी दिए।