मोरङमा उम्मेदवारी दर्ता सुरु

विराटनगर-  मोरङका १७ वटै स्थानीय तहमा उम्मेदवारी दर्ता सुरु भएको छ। आगामी वैशाख ३० गते हुने निर्वाचनका लागि उम्मेदवारी दर्ता सुरु भएको हो। 

विराटनगर महानगरपालिकामा हालसम्म पाँच जनाको उम्मेदवारी परेको छ। दुई वटा वडामा वडाध्यक्ष र तीन जना सदस्यको उम्मेदवारी दर्ता भएको मुख्य निर्वाचन अधिकृतको कार्यालय विराटनगरका सूचना अधिकारी हेमबहादुर बुढाथोकीले बताए। 

उनका अनुसार विराटनगर-१० को अध्यक्षमा माधवराज वाग्लेले स्वतन्त्र उम्मेदवारी दर्ता गराएका छन्। वाग्ले यसअघि सोही वडाका वडाध्यक्ष हुन्। 

२०७४ सालको स्थानीय तह निर्वाचनमा एमालेले टिकट नदिएपछि स्वतन्त्र उम्मेदार बनेर वडाध्यक्ष निर्वाचित भएका थिए। विराटनगर-१० मा खुला सदस्यका लागि मोहनप्रसाद साह हलवाई र वीरेन्द्रबहादुर खड्काको उम्मेदवारी परेको छ। 

विराटनगर–९ को वडाध्यक्षमा नेपाल सद्भावना पार्टीको तर्फबाट किशोरकुमार कलवारको उम्मेदवारी परेको छ। खुला सदस्यमा गणेशकुमार मोदीले उम्मेदवारी दिएका छन्। 

रंगेली नगरपालिकामा मंगल नेशनल अर्गनाइजेसनका तर्फबाट २ वडाध्यक्ष र ४ सदस्यको मनोनयन दर्ता भएको निर्वाचन अधिकृत रामहरि शर्मा काफ्ले बताए। रंगेली-१ र ४ मा वडाध्यक्ष र रंगेली-१, ३ र ४ मा १-१ जनाले सदस्यमा मनोनयन दर्ता गराएको उनले बताए।  

मोरङका सवै स्थानीय तहमा उम्मेदवारी दर्ता प्रक्रिया सुरु भएको र उम्मेदवारी दर्ता चलिरहेको प्रदेश निर्वाचन कार्यालयका प्रमुख लेवन कश्यप अधिकारीले बताए। निर्वाचन आयोगले आइतबार र सोमबार मनोनयनको समय तोकेको छ। 

मोरङका ठूला दलले निर्वाचन अधिकृतको कार्यालयसँग सोमबार मनोनयन दर्ताको समय लिएको बताइएको छ।