विराटनगर महानगरको मेयरमा कांग्रेसबाट यी हुन् ७ जना आकांक्षी

विराटनगर- आगामी वैशाख ३० गते हुने स्थानीय तहको निर्वाचनका लागि नेपाली कांग्रेस महानगर समितिले प्रमुखमा ७ र उपप्रमुखमा ११ जनाको नाम सिफारिस गरेको छ। 

विराटनगरको प्रमुखका लागि केन्द्रीय सदस्य अमृत अर्याल, डा. डिला संग्रौला, वर्तमान नगर प्रमुख भीम पराजुली, कांग्रेस मोरङका जिल्ला उपाध्यक्ष नागेश कोइराला, महानगर सभापति दिपक चापागाईं, प्रदेश समिति सदस्य एवं पूर्वप्रशासकीय अधिकृत गोपाल रेग्मी र वर्तमान उपप्रमुख इन्दिरा कार्कीको नाम सिफारिसमा परेको छ। 

 उपप्रमुखमा १२ जना आकांक्षी भए । उपप्रमुखमा निरज कोइराला, झुमा गौतम, प्रमिला गच्छदार, प्रमिला थापा, पुनम सिंह, जस्मिन मण्डल, पंकज बर्मा, दुर्गा कोइराला, डा. सीता घिमिरे, गीता सिलवाल, राजु मास्के र सूची चौधरीको नाम सिफारिस गरिएको महानगर सभापति दीपक चपागाईंले जानकारी दिए। चौधरी ०७४ को निर्वाचनमा तत्कालिन फोरम लोकतान्त्रिकबाट उपप्रमुखमा उपाजित भएकी हुन्।

चपागाईंका अनुसार प्रमुख र उपप्रमुखका सम्भावित उम्मेदवारको नामावली केन्द्रीय कार्यालयका सचिव प्रेम केसीलाई बुझाइएको उनले बताए। सभापति चापागाईंसहितको टोली काठमाडौं पुगेर महानगरका तर्फबाट सिफारिसमा परेकाको नामावली बुझाएको हो। 

सत्ता गठबन्धनमा रहेका दलबीच चुनावी तालमेलको प्रयास भइरहेका बेला कांग्रेसले भने एकल रूपमा पार्टीको केन्द्रीय समितिलाई प्रस्तावित उम्मेदवारको नाम सिफारिस गरेको हो। पार्टीका महानगर सभापति चापागाईंले विराटनगरमा कुनै दलसँग तालमेल नहुने र कांग्रेस एक्लै चुनावमा जाने स्पष्ट पारे। 

यसअघि कांग्रेसबाटै भीम पराजुलीले एमालेका विनोद ढकाललाई ५ हजार ६९० मत अन्तरले पराजित गर्दै विराटनगरको प्रमुखमा विजयी भएका थिए। २०७४ को स्थानीय तहको निर्वाचनमा विना तालमेल कांग्रेस प्रमुख, उपप्रमुख र ७ वटा वडामा निर्वाचित भएको थियो। एमाले र तत्कालीन फोरम लोकतान्त्रिक तथा माओवादी र तत्कालीन संघीय समाजवादी फोरमबीच चुनावी तालमेल भएको थियो।