आईपीएलमा आज गुजरात र पञ्जाब भिड्दै

काठमाडौं– जारी इन्डियन प्रिमियर लिग (आईपीएल) क्रिकेटमा आज गुजरात टाइटन्सले पञ्जाब किङ्ग्सविरुद्ध खेल्दैछ। खेल नेपाली समय अनुसार बेलुकी पौने ८ बजे सुरु हुनेछ।

लिगमा २ खेल खेल्दा दुवै खेलमा जित निकालेको गुजरात शतप्रतिशत नतिजाका साथ ४ अंक जोड्दै तालिकाको चौथो स्थानमा छ भने एक खेल बढी अर्थात ३ खेल खेलेको पञ्जाब दुई खेलमा जित र एक खेलमा हार व्यहोर्दै समान ४ अंकका साथ तालिकाको पाँचौं स्थानमा रहेको छ। आजको खेल जित्ने टोली तालिकाको तेस्रो स्थानमा उक्लिने छ। गुजरात टाइटन्सको कप्तानी हार्दिक पान्ड्याले गर्दैछन् भने पञ्जाबको मयंक अग्रवालले।

दुवै टिमले अहिलेसम्म आईपीएलको उपाधि जित्न सकेका छैनन्। पञ्जाब एकपटक प्रतियोगिताको फाइनलसम्म पुग्न सफल भएको थियो तर उपाधि जित्न भने असफल रह्यो।