शिक्षकको दुर्व्यवहार घटना : लेटाङमा बिहान ७ बजेदेखि कर्फ्यु

विराटनगर- यौन दुर्व्यवहारका आरोपित पक्राउ गर्न गएको प्रहरी टोलीमाथि आक्रोशित भीडको आक्रमणबाट एक महिला प्रहरीको मृत्यु भएपछि तनावग्रस्त बनेको लेटाङमा सोमबार बिहान ७ बजेदेखि कर्फ्यु लगाइने भएको छ।

सोमबार बिहान ७ बजेदेखि अर्को निर्णय नहुन्जलेसम्मका लागि कर्फ्यु लगाउने निर्णय भएको मोरङका प्रमुख जिल्ला अधिकारी काशीराज दाहालले बताए। उनका अनुसार लेटाङ नगरपालिकाको वडा नम्बर ३ र ४ को गंगेचौक र कमलपुर क्षेत्र, वडा नम्बर ५ को सबै क्षेत्र र उत्तरमा वडा नम्बर ६ को वडा कार्यालय क्षेत्र, पूर्वमा मोरङ्गे खोला क्षेत्र र पश्चिममा चिसाङ खोला क्षेत्रमा कर्फ्यु लगाइने प्रशासनले जनाएको छ।

आइतबार साँझ लेटाङ-५ खेरुवामा भएको झडपमा प्रहरी जवान उर्मिला श्रेष्ठको मृत्यु भएको थियो। 

आइतबार बिहान लेटाङ नगरपालिका-५ खेरुवास्थित शिक्षा विकास माविका ५६ वर्षीय शिक्षक मनोज पौडेलले कक्षा ६ मा अध्ययनरत विद्यार्थीमाथि होलीका दिन दुर्व्यवहार गरेको घटना सार्वजनिक भएको थियो। 

घटनाबारे विद्यालयमा शिक्षक र अभिभावकको बैठक बसिरहेको समयमा आक्रोशित भीडले शिक्षकलाई बन्दी बनाएर आक्रमणको प्रयास भएपछि स्थितिलाई नियन्त्रणमा लिन पुगेको प्रहरीसँग झडप भएको थियो। 

 आक्रोशित भीडले सवारी साधनमा आगजनी र तोडफोड गर्नथालेपछि प्रहरीले हवाइफायर र केही सेल अश्रुग्याँस प्रहार गरेको थियो। घटनामा दुई विद्यार्थीसहित १६ जना सुरक्षाकर्मी घाइते भएको प्रहरीले जनाएको छ।