प्रदेश १ : मानव अधिकार उल्लंघन तथा ज्यादतीका घटनामा वृद्धि

विराटनगर- प्रदेश १ मा एक वर्षको अवधिमा मानव अधिकार उल्लंघन तथा ज्यादतीका घटनामा वृद्धि भएको छ। सन् २०२० को तुलनामा सन् २०२१ मा १०६ जना बढी पीडित भएका छन्।

सन् २०२१ जनवरी देखि डिसेम्बर सम्मको अवधिमा राज्य पक्षबाट ३० जना र अन्य पक्षबाट ८८९ जना पीडित भएका छन् भने र सन् २०२० मा ८ सय १३ जना पीडित भएको पाइएको छ। 

विराटनगरमा ३०औं संस्करणको मानव अधिकार वर्ष पुस्तक २०२२ सार्वजनिकीकरण कार्यक्रममा गत इन्सेक प्रदेश १ प्रमुख सोमराज थापाले गत वर्षको तुलनामा यस वर्ष प्रदेश १ मा १ सय ६ जना बढी मानव अधिकार उल्लंघन तथा ज्यादतीका घटनामा पीडित भएको बताए। 

सन् २०२१ मा प्रदेश १ मा अपहरणका घटनामा चार, गिरफ्तारी ३, कुटपिट ४५, बाल अधिकार ३ सय ५, हिरासतमा मृत्यु २, घाइते १२, हत्या ६७, जातीय विभेद १, धम्की ४, यातना १, महिला ४६८ र कारागारमा मृत्यु ७ गरी ९ सय १९ जना मानव अधिकारका घटनामा पीडित भएको प्रलेख अधिकृत पुन्यप्रसाद अधिकारीले बताए। सन् २०२१ महिला अधिकारका घटनामा ४ सय ६८ जना पीडित भएको उनले बताए। 

सन् २०२१ मा बाल अधिकारका घटनामा ३ सय ५ जना पीडित भएको इन्सेकले जनाएको छ। यो वर्ष प्रदेश १ का कूल १ सय ३७ स्थानीय तहमध्ये ८ स्थानीय तहमा मानव अधिकार उल्लंघन तथा ज्यादतीका घटना अभिलेख नभएको इन्सेकले जनाएको छ। सुनसरीको इटहरी उपमहानगरपालिकामा सबैभन्दा बढी ३६ जना पीडित भएका घटना भएको इन्सेकले बताएको छ।