प्रदेश १ मा सामाजिक विकासमन्त्री यादवले गरे पहिलो मतदान

विराटनगर- प्रदेश १ मा राष्ट्रिय सभा सदस्य पदका लागि मतदान सुरु भएको छ। सामाजिक विकासमन्त्री जयराम यादवले पहिलो मतदान गरेका छन्।

प्रदेश १ मा तीन सिटका लागि मतदान हुँदैछ। तीन सिटका लागि सत्ता गठबन्धन, एमाले र राप्रपाका गरी ८ जना उम्मेदवार प्रतिस्पर्धामा छन्।

अन्य, महिला र अपाङ्गता वा अल्पसंख्यक गरी तीन सिटका लागि गठबन्धनका तर्फबाट अन्य समूहमा नेपाली कांग्रेसका गोपालकुमार बस्नेत, महिलामा नेकपा एकीकृत समाजवादीकी जयन्ती राई र अपाङ्गता वा अल्पसंख्यकमा जनता समाजवादी पार्टीका हेमराज राई , नेकपा एमालेबाट अन्यमा गुरु बराल, महिलामा सुमित्रा सुवेदी भण्डारी र अपाङ्गता वा अल्पसंख्यकमा सोनाम गेल्जेन शेर्पा, राप्रपाबाट अन्यमा अम्बरबहादुर विष्ट र महिलामा रञ्जु प्याकुरेल चुनावी प्रतिस्पर्धामा छन्।

प्रदेश १ मा स्थानीय तह र प्रदेश गरी ९ हजार ३१२ मतभार छ। जसमा नेकपा एमालेको ४ हजार ५२४ रहेको छ। उसको स्थानीय तहमा २ हजार ५५६ र प्रदेशमा १ हजार ९६८ मतभार रहेको छ। पाँच दलीय गठबन्धनको मतभार ४ हजार ६६८ रहेको छ। राप्रपाको १२० मतभार छ।

स्थानीय तहका प्रमुख- उपप्रमुख २७२ र प्रदेश सांसदहरू ९२ गरी ३६४ मतदाता रहेको प्रदेश निर्वाचन कार्यालयका प्रमुख लेवन कश्यप अधिकारीले बताए। स्थानीय तहका प्रमुख-उपप्रमुखको १८ र प्रदेश सांसदको मतभार ४८ छ।