गरीखाने वर्गको पीडा : हाम्रा लागि रोगभन्दा भोक ठूलो

काठमाडौं– नयाँ बानेश्वरस्थित न्यू फेसन सुज सेन्टरका सञ्चालक दिलबहादुर रम्तेल अचेल निकै चिन्तित हुन्छन्। कोरोना महामारीको तेस्रो लहर पिकमा पुगिरहँदा सानो पुँजीबाट व्यवसाय सञ्चालन गरेका रम्तेल कतै फेरि लकडाउन हुने हो कि भनेर पिरोलिएका हुन्। बढ्दो संक्रमणसँगै ग्राहक आउने क्रम घटेको छ। 

‘सानो पुँजीबाट पसल खोलियो। सटरको भाडा तिर्नैपर्छ, कोठा भाडा पनि छ। यसैबाट कमाएर परिवारको पेट पाल्ने हो। छोराछोरी पढाउनैपरो। हामी गरिखाने वर्ग त कोरोना महामारीले निकै समस्यामा परेका छौं,’ रम्तेलले सुनाए। पछिल्लो दुई हप्तायता दिनमा एक–दुई ग्राहक मात्रै पसलमा आउने गरेको उनले बताए।

ग्राहक कुर्दै मोबाइल चलाएर दिन बित्छ रम्तेलको। एक महिना अघिमात्रै उनको पसलमा दिनभर ग्राहक टुट्दैनथे। ‘पहिले हप्ता–हप्तामा होलसेल जानुपर्थ्यो सामान लिन। अहिले दुई हप्ता भइसक्यो, एक पटक पनि गएको छैन,’ उनले भने। पसलको भाडमात्रै महिनाको ३० हजार तिर्नुपर्छ। यो महिना भाडा कसरी तिर्ने भन्ने चिन्ता छ। घरपरिवार र अन्य खर्च त छँदैछ।