'ए' डिभिजन लिगमा कोरोनाको असर : च्यासलका दुई खेलाडी संक्रमित, थुप्रै बिरामी

काठमाडौं– देशमा बढ्दो कोरोना भाइरसको संक्रमण सहिद स्मारक ए डिभिजन लिग क्लबमा पनि देखिन थालेको छ।

भोलि बिहीबारबाट लिगको नवौं चरणका खेल सुरु हुँदैछन्। तर त्यसअघि धेरै क्लबका खेलाडी बिरामी पर्ने देखिएको छ भने केही खेलाडीमा कोभिड संक्रमण देखा परेको छ।

‘हाम्रा दुई खेलाडीमा कोभिड १९ को संक्रमण पुष्टि भएको छ,’ च्यासल युथ क्लबका सहायक प्रशिक्षक आशिफ थापा मगरले भने, ‘केही थप खेलाडी पनि प्रभावित बनेका छन्।’

च्यासलका कमल थापा र प्रदीप भण्डारीलाई कोभिडको संक्रमण देखिएको उनले बताएका छन्। ‘मनाङविरुद्ध पोखराको खेलबाट फर्किएपछि कमललाई केही लक्षण देखिएको थियो। टेस्ट गर्दा पोजेटिभ आयो। लक्षण नभएको प्रदीपलाई पनि देखिएको छ,’ मगरले भने।

च्यासलका मात्र होइन, अन्य क्लबका खेलाडी पनि बिरामी पर्ने गरेका छन्। यता एन्फाले खेलाडी बिरामी भएको देखिए र कोभिडका केही लक्षण देखिए पीसीआर टेस्ट गराउन क्लबलाई अनुरोध गरेको छ। 

यता जावलाखेलको टिममा पनि अहिले नौ खेलाडी बिरामी छन्। ‘हाम्रा खेलाडी पनि धेरै बिरामी छन्। हिजो पनि १४ खेलाडी मात्र अभ्यासमा उपस्थित हुन सके,’ जावलाखेलका प्रशिक्षक किशोरकुमार केसीले भने।

खेलाडीमा रुघा लाग्ने, टाउको दुख्ने भइरहेको न्युरोड टिमका प्रशिक्षक राजुकाजी शाक्य बताउँछन्। ‘क्याम्पमै भएका खेलाडीहरुले त नियम पालना गरेका छन्। सतर्क नै छन्। जो खेलाडीहरु घरमा बसिरहेका छन्, उनीहरुले पनि देशको अवस्था बुझेर आफैं सावधानीका उपायहरु अपनाउनु पर्छ।’

अहिले नेपाल सरकारले स्मार्ट लकडाउन गरेको छ। अब रंगशाला छिर्नका लागि पनि कोभिडविरुद्धको कार्ड अनिवार्य भएको छ।

अहिले लिगको नवौं राउन्ड चलिरहेको छ। नवौं राउन्डपछि फिफा विन्डो ब्रेक हुनेछ। तीन गते सुरु हुने त्यो ब्रेक फेब्रुअरी महिनाको बीचसम्म रहनेछ। त्यसबीच मोफसलका प्रतियोगिता हुनेछन्।