भारतमा कोरोना संक्रमितको दैनिक संख्या एक लाख नाघ्यो

काठमाडौं– भारतमा कोरोना संक्रमणको दैनिक आँकडा १ लाख नाघेको छ। पछिल्लो २४ घण्टामा त्यहाँ १ लाख १७ हजार १०० जना संक्रमित थपिएका छन्। सोही अवधिमा ३०२ जना संक्रमितको मृत्यु भएको छ।

भारतमा संक्रमणदर बढेर ७.७४ प्रतिशत पुगेको छ। संक्रमणमुक्त हुने दर ९७.५७ प्रतिशत छ भने मृत्युदर १ प्रतिशत। अहिलेसम्म भारतमा ३ करोड ५० लाखभन्दा बढी संक्रमित भइसकेका छन् भने तीमध्ये ४ लाख ८३ हजार १७८ जनाको मृत्यु भएको छ। 

कोरोना भाइरसको पछिल्लो भेरिएन्ट ओमिक्रोनबाट संक्रमित हुनेको संख्या भने भारतमा ३ हजार ७ पुगेको छ। भारतमा भ्याक्सिनेसन पनि तीव्र गतिमा भइरहेको छ। पछिल्लो २४ घण्टामा मात्र त्यहाँ करिब ९४ लाखले कोभिडको भ्याक्सिन लगाएका छन्। 

उता, विश्व स्वास्थ्य संगठन (डब्लुएचओ)का प्रमुखले कोरोना भाइरसको नयाँ भेरिएन्ट ओमिक्रोनका कारण फैलिरहेको संक्रमणप्रति चिन्ता व्यक्त गरेका छन्। ओमिक्रोनले विश्वभरकै स्वास्थ्य सेवामा दबाब बढेको उनले बताएका छन्।

डब्लुएचओका प्रमुख डा. टेड्रोस घेब्रेयियसले जेनेभामा आयोजित पत्रकार सम्मेलनमा भने, ‘डेल्टाभन्दा ओमिक्रोन कम घातक देखिएको सत्य हो तरपनि यसलाई कमजोर नठान्नुस्।’