बौद्धमा युवक-युवती हत्या गरिएको अवस्थामा मृत फेला

काठमाडौं- काठमाडौं महानगरपालिका–६ बौद्ध फैकास्थित राधाकृष्ण मन्दिर नजिकै सँगै बस्दै आएका युवक-युवती कोठामै मृत फेला परेका छन्।

संखुवासभा घर भई फैका बस्ने २५ वर्षीय अनिस जिमी र खोटाङ साकेला गाउँपालिका–५ घरभई जिमीसँगै बस्ने २२ वर्षीया युसुना राई धारिलो हतियार प्रहार गरी हत्या भएको अवस्थामा कोठामा मृत फेला परेका हुन्।

अनलाइन खेल प्लेयर्स अननोन्स ब्याटलग्राउन्ड ‘पब्जी’ खेलबाट साथी बनेका जिमी र राई सँगै बस्न थालेको २०/२२ दिन मात्र भएको पाइएको प्रहरीले जनाएको छ। बिहीबार साँझ जिमीकी आमासँगै खाना खाएर आफ्नो कोठामा बसेका उनीहरूबीच के/कसरी घटना घट्यो भन्नेबारे अनुसन्धान भइरहेको महानगरीय प्रहरी परिसर काठमाडौं प्रमुख एसएसपी सुदिप गिरीले बताएका छन्।

कोठाभित्र हानाहान भएको जस्तो आवाज आएपछि युवककी आमाले ढोका खोलेर हेर्दा घटना घटेको पाइएको प्रहरीले जनाएको छ ।

घटनाको प्रकृति हेर्दा युवकले युवतीलाई धारिलो हतियार प्रहार गरी हत्या गरेपछि आत्महत्या गरेको जस्तो देखिएको प्रहरीले जनाएको छ।