सडक खन्ने क्रममा माटोले पुरिएर स्काभेटर चालकको मृत्यु

सुर्खेत- सडक खन्नेक्रममा हुम्लामा स्काभेटर चालकको मृत्यु भएको छ। मृत्यु हुनेमा बर्दियाका २६ वर्षीय स्काभेटर चालक सन्तोष थारू रहेकाछन्। 

अदानचुली गाउँपालिका-५ को सेरामा सडक खन्ने क्रममा माटोको ढिस्कोमा पुरिएर चालकको मृत्यु भएको हो। ‘स्काभेटरले सडक खन्दै गर्दा माथिबाट ठूलो माटोको ढिस्को आएछ,’ हुम्लाका डीएसपी हेरम्ब शर्माले भने, ‘माटोले स्काभेटरसहित चालक पुरिएछन्।’ 

माटोमा पुरिएका उनको समयमै उद्दार हुन नसक्दा मृत्यु भएको प्रहरीको अनुमान छ। ‘सुख्खा पहिरो आकारकै माटो खसेछ,’ उनले भने, ‘समयमै उद्दार हुन नसक्दा चालकको मृत्यु भएको हो।’ थप माटो खस्न सक्ने डरले समयमै उद्दारमा ढिलाई भएको उनले बताए। 

साथमै रहेका स्काभेटरका सहचालक भने हाम फालेर बाँचेका छन्। सोमबार बेलुका घटना भएको हो। सोमबार राति नै स्थानीय र प्रहरी मिलेर चालकको शव निकालिएको थिए। घटनास्थल पुग्न सदरमुकाम सिमकोटबाट दुई दिन पैदल हिड्नुपर्छ।