निर्वाहमुखी अवस्थाबाट व्यावसायिक उत्पादनतर्फ अघि बढ्नु अहिलेको आवश्यकता : नेपाल

काठमाडौं- नेकपा एमालेको असन्तुष्ट पक्षको नेतृत्व गरिरहेका नेता माधवकुमार नेपालले निर्वाहमुखी अवस्थाबाट व्यावसायिक उत्पादनतर्फ अघि बढ्नु अहिलेको आवश्यकता भएको बताएका छन्। राष्ट्रिय धान दिवसको अवसरमा शुभकामना दिँदै उनले यस्तो बताएका हुन्।  

‘आज असार १५, राष्ट्रिय धान दिवसको अवसरमा सम्पूर्ण कृषक दाजुभाइ तथा दिदीबहिनीहरूमा हार्दिक शुभकामना व्यक्त गर्दछु,’उनले भनेका छन्, ‘असार महिनालाई ‘मानो रोपेर मुरी उब्जाउने’ महिनाको रूपमा लिने गरिन्छ। नेपालको प्रमुख खाद्यवाली धान नेपालको इतिहास, सभ्यता, संस्कृति र जीवनयापनको अभिन्न अंग रहेकाले असार १५ अर्थात राष्ट्रिय धान दिवसको विशिष्ट महत्व छ।’

किसान अधिकार सुनिश्चित गर्ने, नयाँ पुस्तालाई कृषिप्रति आकर्षित गर्ने, कृषिमा आधुनिकीकरण गर्दै निर्वाहमुखी अवस्थाबाट व्यावसायिक उत्पादनतर्फ अघि बढ्नु अहिलेको आवश्यकता भएको उनको भनाई छ। ‘समयमै मल विउ उपलब्ध गराउने, राहत, सहुलियत र अनुदान उपलब्ध गराउने जस्ता किसानहरूले उठाउँदै आएका मागहरू सम्वोधन गर्दै कृषि क्षेत्रको रुपान्तरणका लागि हामी सवैको सार्थक पहल आवश्यक छ,’उनले भनेका छन्।