राष्ट्रियसभामा स्वतन्त्र हैसियतका लागि निवेदन दिएका बेदुराम भुसाल भन्छन्– पार्टी एकताको पक्षमा रहेर निर्णय गरेको हुँ

काठमाडौं– राष्ट्रियसभा निर्वाचनमा तत्कालीन नेकपाबाट निर्वाचित भएका सांसद बेदुराम भुसालले स्वतन्त्र सांसदका रुपमा मान्यता दिन भन्दै संसद् सचिवालयमा निवेदन दिएका छन् ।

भुसाल नेकपा एमालेको स्थायी कमिटी सदस्य हुन्। तत्कालीन नेकपा हुँदा उनी राष्ट्रियसभामा निर्वाचित भएका थिए। आइतबार उनले आफूलाई कुनै पनि दल रोज्न मन नलागेको भन्दै निवेदन दिएका हुन्। 

‘राष्ट्रियसभामा कुनै दलमा छैन, स्वतन्त्रको रुपमा रहन्छु भनेर निवेदन दिएको हुँ,’ उनले भने, ‘म तत्कालीन समयमा नेकपाबाट निर्वाचित भएको हो, अहिले नेकपा रहेन। कोही एमाले र माओवादी केन्द्रमा हुनुहुन्छ।’

उनले आफू कतै नरहेको र स्वतन्त्र रुपमा रहन चाहेको भन्दै निवेदन दिएको बताए। ‘फागुन २३ को सर्वोच्चके फैसलाले नेकपाको एकता भंग भयो । नेकपा रहेन जता जान पनि स्वतन्त्र भयो,’ उनले भने। 

नेकपा एमालेभित्र देखिएको विवादको बेला तपाईंको निर्णयलाई कुन अर्थमा लिन सकिन्छ जिज्ञासामा उनले भने, ‘मैले धेरै कुरा रोजिन। मैले यो निर्णय पार्टी एकताको पक्षमा रहेर गरेको हुँ।’