वैकल्पिक सरकार गठन हुने अवस्था रहेसम्म संसद् विघटन गर्न पाइँदैनः अधिवक्ता खाती

काठमाडौं- अधिवक्ता खुम्बबहादुर खातीले वैकल्पिक सरकार गठन हुने अवस्था रहेसम्म संसद् विघटन गर्न नपाइने जिकिर गरेका छन्।

प्रतिनिधिसभा विघटनविरुद्ध आजदेखि सुरु भएको निरन्तर सुनुवाइमा बहस गर्दै उनले यस्तो बताएका हुन्। 

रिट निवेदकका तर्फबाट उनले बहस गरेका हुन्।  ‘वैकल्पिक सरकार गठन हुने अवस्था बाँकी रहँदासम्म कसरी संसद विघटन हुन्छ,’ उनले भने, ‘प्रक्रिया नै पूरा नगरेर सरकार गठन हुने/नहुने परीक्षण नै नगरेर विघटन गरिएको छ।’

आफ्नो अनकूलतामा नभएपछि प्रधानमन्त्री र राष्ट्रपतिले प्रतिनिधिसभा विघटन गरेर संविधान मिचेको उनले आरोप  लगाए।  ‘यो गैर संवैधानिक छ। मनासिबपूर्ण तरिकाले प्रतिनिधिसभा विघटन गरियो देउवालाई प्रधानमन्त्रीमा नियुक्त गर्ने सबै आधर छन् त्यसैले उनलाई नियुक्त गरिनुपर्छ,’ उनले भने। 

जेठ ८ गते दोस्रो पटक गरिएको प्रतिनिधिसभा विघटनविरुद्ध सर्वोच्च अदालतमा दायर गरिएको मुद्दाको आजदेखि संवैधानिक इजलासमा निरन्तर सुनुवाइ सुरु भएको हो।

सुरुवातमा रिट निवेदकले बहस गर्ने छन्। त्यसपछि विपक्षीका तर्फबाट बहस हुनेछ। एमीकस क्यूरीले पनि आफ्नो राय दिन बहस गर्ने छन्। 

यो पटकको सुनुवाइमा इजलासले दुवै पक्षलाई बहसका लागि समय नै निर्धारण गरिदिएको छ।