स्वास्थ्यमन्त्रीबाट पदमुक्त भएका तामाङले भने, खोप आउन ढिला भए नैतिक जिम्मेवारी मेरो हुनेछ

काठमाडौं– सर्वोच्च अदालतको मंगलबारको आदेशपछि स्वास्थ्य तथा जनसंख्यामन्त्री पदबाट मुक्त भएका शेरबहादुर तामाङले खोप ल्याउन सबै प्रक्रिया भएको र केही दिनमा नै खोप आउने सुनिश्चित भएको जनाएका छन्।

उनले बुधबार सामाजिक सञ्जालमार्फत आफूले १९ दिनसम्म स्वास्थ्य मन्त्रालयको जिम्मेवारी सम्हाल्दा गर्न खोजेको कामको विवरण सार्वजनिक गरेका हुन्। उनले खोप ल्याउन ढिलाइ भए त्यसको जिम्मेवारी आफूले लिने पनि भनेका छन्।

तामाङले फेसबुकमा लेखेका छन्, ‘पछिल्लो राजनितिक घटनाक्रमले खोप आउन ढिलो हुने र नेपाली नगरिकको जीवनमाथि नै तलमाथि भएमा त्यसको नैतिक जिम्मेवारी मेरो हुनेछ।’ उनले राजनीतिको खेलमा नेपाली नगरिकको जीवनमाथि खेलवाड गर्ने छुट कसैलाई नभएको पनि बताएका छन्।  आफूले कोरोना नियन्त्रणमा इमान्दार प्रयत्न गरेको दाबी गरेका छन्।

यस्तै उनले सबै नेपाली जनताको स्वास्थ्य उपचार निःशुल्क गर्ने सम्बन्धी छलफल र प्रारम्भिक प्रक्रिया सुरु भएको जानकारी दिएका छन्।
तामाङले  सम्पूर्ण सरकारी अस्पताललाई सुबिधासम्पन्न बनाई अस्पतालमा आउने सबै बिरामीलाई उपचारको सुनिश्चित गर्ने प्रकृया आरम्भ भएको दाबी गरेका छन्। यस्तै उनले गाँजाको औषधीय उपयोग र अनुसन्धानका लागि पहल सुरु भएको जानकारी दिएका छन्।