डुबेर ज्यान गुमाएका ५ बालिकाको परिवारलाई गाउँपालिकाको नगद सहयाेग

जनकपुरधाम- धनुषाको मुखियापट्टी मुसहरनिया गाउँपालिकाले डुबेर ज्यान गुमाएका ५ बालिकाको परिवारलाई रकम हस्तान्तरण गरेको छ।

मुखियापट्टी मुसहरनिया गाउँपालिका-६ स्थित एक पोखरीमा डुबेर मृत्यु भएका ५ बालिकाको परिवारलाई गाउँपालिका अध्यक्ष मनोजकुमार यादव र उपाध्यक्ष मिरा देवी महतोले रकम हस्तान्तरण गरेका हुन्। 

पाँचै बालिकाको परिवारलाई १ लाख ५१ हजारको चेक हस्तान्तरण गरिएको छ। सो चेक पीडित परिवारको घरमै पुगेर हस्तान्तरण गरिएको थियो। यसअघि प्रदेश सरकारले समेत पाँचै बालिकाको परिवारलाई १÷१ लाख रुपैयाँको राहत रकम उपलब्ध गराउने घोषणा गरेको थियो। 

केही दिनअघि मात्रै मुखियापट्टी मुसहरनियास्थित वडा नम्बर ६ मा रहेको हुलास यादवको खेतमा निर्माणधीन पोखरीमा डुबेर ५ बालिकाको मृत्यु भएको थियो। मृत्यु हुनेमा  १३ वर्षीया मञ्जु पूर्वे, १२ वर्षीया लक्ष्मीनिया यादव, १० वर्षीया चन्दाकुमारी भगत, १२ वर्षीया चान्दनी ठाकुर र १२ वर्षीया ललिता साह छन्।