थपियो निषेध आदेश, निजी सवारीमा जोरबिजोर प्रणाली

काठमाडौं– गएको वैशाख १६ गतेदेखि काठमाडौं उपत्यकामा जारी निषेध आदेश १४ असारसम्मलाई थपिएको छ। 

केही खुकुलो पार्दै निषेध आदेशको समय थपिएको हो। काठमाडौं उपत्यकाका तीनै जिल्लाका सीडीओको बैठकले ७ असारसम्मका लागि जारी निषेध आदेश केही खुकुलो बनाउँदै थप गर्ने निर्णय गरेको हो। 

भक्तपुरका प्रमुख जिल्ला अधिकारी प्रेमप्रसाद भट्टराईका अनुसार  १४ गतेसम्म निजी सवारीसाधन जोरिबिजोर नम्बरका आधारमा सञ्चालन गर्न दिने निर्णय भएको छ। अर्थात् जोर गते जोर नम्बरका र बिजोर गते बिजोर नम्बर प्लेटका सवारीसाधन चलाउन पाइनेछ।

पसल पनि बार तोकेर खोल्न दिने गरी निर्णय गरिएको भट्टराईले जानकारी दिए। आइतबार, मंगलबार र बिहीबार सुनचाँदी, भाँडा, विद्युतीय र घरायसी सामान बिक्री गर्ने पसल, अटोमोबाइलका पार्टपुर्जाका पसल खोल्न पाइनेछ।

सोमबार, बुधबार र शुक्रबार सपिङ मल, खेलकुद सामानका पसल, कपडा, जुत्ता, फेन्सी, कस्मेटिक, गिफ्ट र टेलरिङ खुल्नेछन् भने खाद्यान्न र तरकारी पसल हरेक दिन खोल्न पाइनेछ।