पहिरोले केहीबेर थुनिएको मर्स्याङ्दी खुल्यो, किनारबाट मानिसहरूलाई मुभ गराइसक्यौँ : प्रशासन

मनाङ- पहिरोले केहीबेर थुनिएको मर्स्याङ्दी नदी खुलेको छ। पहिरोका कारण नेस्याङ गाउँपालिका-४ मा थुनिएको मर्स्याङ्दी खुलिसकेको मनाङकी सहायक प्रमुख जिल्ला अधिकारी शारदा चालिसेले जानकारी दिइन्। 

‘पहिरोले ३-४ मिनेटजति मर्स्याङ्दी नदी थुनिएको थियो। अहिले थुनिएको भागजति खुलिसकेको छ,’ चालिसेले भनिन्। 

एकसातायता भएको वर्षाका कारण मर्स्याङ्दी नदीमा उर्लिएको बाढी शनिबार झनै बढेको चालिसेको भनाइ छ। पहिरोले थुनिएको भाग खुलेपनि बाढी भने आइरहेको उनले जानकारी दिइन्। पहिरोले नदी थुनिएको जानकारी प्राप्त हुने बितिकै नदी किनारबाट मानिसहरूलाई मुभ गराइसकेको समेत उनको भनाइ छ। थुनिएको नदी खुलेपनि जोखिम भने कामयै रहेको उनले बताइन्। 

यसअघि पनि सदरमुकाम चामेमा मर्स्याङ्दी थुनिँदा बाढी आएको थियो। चामेको च्याट्टेखोला र घट्टेखोलामा आएको बाढीले यसअघि नै १० घर भत्काइसकेको छ भने झण्डै तीन सय जना विस्थापित भएका छन्।

यस्तै, मनाङको ताल गाउँमा ३० घर, धारापानीमा ७ घर, पिसाङमा २ घर लगायत जिल्लाभर हालसम्म ५५ घर बाढीले भत्काएको जिल्ला प्रशासन कार्यालयले जानकारी दिएको छ। हालसम्म मनाङमा ८ वटा झोलुङ्गे पुल, एउटा मोटरेबल पुल, ३ वटा काठको मोटरेवल पुल बाढीले बगाएको छ।