प्रशासकीय अधिकृतलाई ज्यान मार्ने धम्की दिने कार्यालय सहयोगी पक्राउ

वीरगञ्ज- बाराको सुवर्ण गाउँपालिकाका प्रमुख प्रशासकीय अधिकृत नवीनकुमार श्रीवास्तवलाई उनकै कार्यालय सहयोगी मुकेशप्रसाद यादवले ज्यान मार्ने धम्की दिएका छन्।

सुवर्ण गाउँपालिका-४ हर्दिया टोलका २८ वर्षीय यादवले अपरिचित नम्बरबाट श्रीवास्तवलाई फोन तथा म्यासेज गरेर १५ लाख रुपैयाँ माग्दै नदिए मार्ने धम्की दिएको आरोपमा प्रहरीले पक्राउ गरेको छ।

यादव गाउँपालिकामा नै करार सेवामा कार्यरत कार्यालय सहयोगी हुन्। अपरिचित नम्बरबाट श्रीवास्तवलाई फोन तथा म्यासेज गरी एक घण्टाभित्र १५ लाख रुपैयाँ नदिए गोली हानी हत्या गर्छु भनेर धम्की दिएको आरोपमा प्रहरीले यादवलाई पक्राउ गरेको छ।

फोनको अडियो रेकर्डसहित प्रशासकीय अधिकृत श्रीवास्तवले प्रहरी कार्यालयमा उजुरी दिएका थिए। अनुसन्धानको क्रममा यादवको संलग्नता देखिएपछि पक्राउ गरिएको जिल्ला प्रहरी कार्यालय बाराका प्रवक्ता प्रहरी नायब उपरीक्षक गौतम मिश्रले जानकारी दिए।

यादवले घटनामा भारतीय आफन्तको समेत प्रयोग गरेको खुलेकाले उनीहरूको खोजी भइरहेको प्रहरीले जनाएको छ।