आगामी आर्थिक वर्षको बजेट यथार्थपरक : मन्त्री आङबुहाङ

विराटनगर- प्रदेश १ का आर्थिक मामिला तथा योजना मन्त्री  टंक आङ्बुहाङले आगामी आर्थिक वर्ष २०७८/७९ को बजेट यथार्थपरक रहेको बताएका छन्। उनले बजेट सफलरुपमा कार्यान्वयन हुने दाबी गरे। 

मन्त्रालयमा बुधबार आयोजित वजेट सम्वन्धी पत्रकार सम्मेलनमा बजेट कार्यान्वयनलाई जिम्मेवार र जवाफदेही बनाउन अनिवार्य रुपमा माथिल्लो पदाधिकारीदेखि अधिकृत तहसम्म कार्यसम्पन्न सम्झौता गरिने बताए। उनले आर्थिक वर्ष सुरु हुनु अगावै बजेट तथा कार्यक्रमको कार्यान्वयन कार्य योजना सवै मन्त्रालय तथा निकायहरुबाट स्वीकृत गरी कार्यान्वयनमा ल्याइने बताए। 

मन्त्री आङबुहाङले स्वीकृत आयोजनाहरू समयमै सम्पन्न गर्न जिम्मेबार अधिकारीले बोलपत्र आव्हान गर्ने, मूल्याङ्‍कन गर्ने तथा खरिद सझौता गर्ने कार्य आर्थिक वर्षको पहिलो त्रैमासिक अवधि भित्रै गरिसक्नु पर्ने उनले बताए। 

कोभिड–१९ को महामारीका कारण आर्थिक वर्ष २०७८/७९ मा पदाधिकारी र कर्मचारीको बैठक भत्ता कटौती गरिएको मन्त्री आङबुहाङले बताए। संसद पूर्वाधार विकास कोषलाई निरन्तरता दिएको उनले बताए। 

मन्त्रालयका सचिव उत्तरकुमार खत्रीले प्रदेशको राजश्व क्षेत्र विस्तारका लागि विज्ञ समूह गठन गरि परिचालन गर्ने बताए। उनले भौतिक पूर्वाधार विकास मन्त्रालयमा १०८ आयोजना भएकोले बजेटको रकम धेरै राखिएको जानकारी दिए।