राउटे युवतीमाथि भएको यौन दुर्व्यवहारका भिडियो युट्युबबाट हटाउन अदालतको आदेश

सुर्खेत– सुर्खेत जिल्ला अदालतले राउटे युवतीमाथि भएको यौन दुर्व्यवहारका भिडियो युट्युबबाट हटाउन आदेश दिएको छ। न्यायाधीश डा.राजेन्द्रकुमार आचार्यले शुक्रबार यस्तो आदेश दिएका हुन्। अदालतले युट्युबबाट भिडियो नहटाने साइट बन्द गर्नसमेत आदेश दिएको छ। करणीजन्य अपराधका सामग्री गोप्य हुनुपर्नेमा केही युट्युबमा पीडितको पहिचान खुलाएर भिडियो सार्वजनिक भएपछि परेको मुद्दामा अदालतले यस्तो आदेश  दिएको हो।

‘युट्युब लगायतका सामाजिक सञ्जालमा राखिएका सामग्री  हटाउन नेपाल सरकारमार्फत विज्ञप्ति नै जारी गर्नुपर्ने अवस्था देखिएको छ। यसर्थ संघीय गृह मन्त्रालयमार्फत सूचना जारी गर्न जिल्ला प्रशासन कार्यालय सुर्खेतमा प्रस्तुत आदेशको प्रतिलिपिसहित कारबाहीका लागि लेखि पठाउनू’ आदेशमा भनिएको छ।

जेठ २१ गते राति गुर्भाकोटमा दुई युवकले राउटे युवतीमाथि गरेको यौन दुर्व्यवहारका भिडियो सामाजिक सञ्जाल तथा युट्युवबमा छाइरहेका छन्।

यस्तै अदालतले यसबारे पत्रकार महासंघ केन्द्रीय कार्यालयलाई लेखिपठाउन पनि भनेको छ। जिल्लास्थित पत्रकारहरुको संगठनमार्फत यस्ता सामग्री प्रचारप्रसार नगर्न नगराउनसमेत अदालतले ध्यानाकर्षण गराएको छ। अदालतले पीडित युवतीको सुरक्षालाई ध्यान दिन जिल्ला प्रहरी कार्यालय सुर्खेतलाई आदेश दिएको छ। पीडित युवती असुरक्षित रहेको भन्दै राष्ट्रिय मानवअधिकार आयोगले ध्यानाकर्षण गराएको अदालतले जनाएको छ।

जेठ २१ गते राति गुर्भाकोटमा दुई युवकले राउटे युवतीमाथि गरेको यौन दुर्व्यवहारका भिडियो सामाजिक सञ्जाल तथा युट्युवबमा छाइरहेका छन्। युट्युब, सामाजिक सञ्चाल तथा केही सञ्चारमाध्यमले समेत पीडितसँग सम्बन्धित सामग्री प्रसारण गर्दै आएका छन्। यौन दुर्व्यवहारका भिडियो बाहिरिएपछि जेठ २३ गते आरोपितहरुलाई प्रहरीले पक्राउ गरेको छ। घटनामा संलग्न रहेको आरोपमा गुर्भाकोट नगरपालिका–९ बोटेचौरस्थित मनकामना होटल सञ्चालक विनोद पुन, दोमनबहादुर घर्ती र भूपेन्द्र बुढा पक्राउ परेका छन्।

दोषीहरुमाथि अनुसन्धान गर्न अदालतले १० दिनको म्याद थप गरेको छ। पीडित युवतीहरुले शुक्रबार मात्रै स्वास्थ्य परीक्षण गराएका छन्।

यो पनि पढ्नुस्,

राउटे युवतीमाथि दुर्व्यवहार : पीडित नखुल्दा अनुसन्धान असहज

राउटे युवतीमाथि यौन दुर्व्यवहार गर्नेलाई हदैसम्मको कारबाही गर्न माग

राउटे मुखिया भन्छन्- जनताले दुःख पाउन थाले, प्रहरी राखिदेऊ

पीडित राउटे युवती झनै असुरक्षित : आफ्नै समुदायभित्रैबाट दण्डको खतरा

असुरक्षा बढेपछि राउटे बस्ती सिल