दुई बालक हत्या प्रकरण : घटनास्थलमा तालिम प्राप्त कुकुर

पर्सा - कलैया उपमहानगरपालिका- ७ रंगपुरमा रहेको मदर्शा सल्फिया कन्जुल उलुममा ९ वर्षीय उशमान अन्सारी र ७ वर्षीय अमिन अन्सारीको मृत्यु बारे अनुसन्धान गर्न तालीम प्राप्त कुकुरसहितको टोली परिचालन गरिएको छ। 

तालीम प्राप्त कुकुरसहित प्राविधिकको टोली परिचालन गरिएको बाराका प्रहरी नायब उपरीक्षक गौतम मिश्रले जानकारी दिए। थप अनुसन्धान गर्न सहज होस् भनेर कुकुर मगाएको उनले बताए।

थप टोली प्रदेश प्रहरी कार्यालयबाट आउने क्रममा रहेकाले अहिले नै सबै कुरा खुलाउन नहुने उनले बताए। कलैया उपमहानगरपालिका-७ निवासी अब्दुल अंसारीका दुई छोरा सोमबार बेलुकादेखि बेपत्ता भएका थिए। उनीहरूको आज बिहान शव मदर्शा नजिकै भेटिएको हो। अहिले घटनास्थललाई प्रहरीले सील गरेको छ। सादा पोशाकमा प्रहरीसमेत परिचालन गरिएको प्रहरीले जनाएको छ।