राष्ट्रियसभा सदस्यको उपनिर्वाचनका लागि उम्मेदवारी दर्ता

काठमाडौं– वाग्मती प्रदेशमा राष्ट्रियसभा सदस्य उपनिर्वाचनका लागि नेकपा एमालेबाट रामबहादुर थापा ‘बादल’ र स्वतन्त्र उम्मेदवार खिमलाल देवकोटाको उम्मदेवारी परेको छ।

प्रदेशको राजधानी हेटौंडास्थित निर्वाचन अधिकृतको कार्यालयमा पुगेर थापा र देवकोटाले उम्मेदवारी दर्ता गराएका हुन्। थापाको प्रस्तावकमा वाग्मती प्रदेशका मुख्यमन्त्री डोरमणि पौडेल र समर्थकमा सामाजिक विकास मन्त्री सरस्वती बस्नेत छन्।

देवकोटाको प्रस्तावकमा भने नेकपा माओवादी केन्द्र वाग्मती प्रदेशसभा संसदीय दलका नेता शालिकराम जम्मकट्टेल र समर्थकमा नेपाली कांग्रेस संसदीय दलकी प्रमुख सचेतक राधा घले छन्। देवकोटालाई नेपाली कांग्रेस, नेकपा माओवादी केन्द्र, जनता समाजवादी पार्टी, नेकपा एमालेको माधव नेपाल समूहको समर्थन छ।

राष्ट्रियसभा सदस्य उपनिर्वाचनमा नेपाल मजदुर किसान पार्टीले पनि उम्मेदवारी दिएको छ। नेमकिपाका उम्मेदवार कृष्णबहादुर तामाङ बनेका छन्।

राष्ट्रियसभामा वाग्मती प्रदेशको ‘अन्य’ समूहबाट निर्वाचित रामबहादुर थापाले आफू निर्वाचित भएको दल नेकपा माओवादी केन्द्र परित्याग गरेपछि उनको स्थान खाली भएको हो। सोही ठाउँमा निर्वाचन आयोगले जेठ ६ गते उपनिर्वाचन गर्न लागेको हो।