गण्डकीको संसद् चलाउने सहमति

पोखरा– वैशाख १५ गतेदेखि अवरुद्ध गण्डकी प्रदेश सभाको बैठक २७ गते बस्ने भएको छ। कार्यव्यवस्था परामर्श समितिले आजको बैठकमा बैठक डाक्ने सहमति भएको सभामुख नेत्रनाथ अधिकारीले नेपाल समयलाई जानकारी दिए। 

मुख्यमन्त्री पृथ्वीसुब्बा गुरुङविरुद्ध ल्याइएको अविश्वास प्रस्तावमा सोही दिन छलफल र कारवाही हुने अधिकारीले बताए। 

वैशाख १ गते संसद् सचिवालयमा दर्ता भएको प्रस्तावमाथि ६ गतेको बैठकमा छलफल हुने भनिए पनि गुरुङले वैशाख २ गते नै संसद् अन्त्यको सिफारिस प्रदेशप्रमुख समक्ष गरेका थिए। 

सोही सिफारिसअनुसार निवर्तमान प्रदेश प्रमुख अमिक शेरचनले संसदको विधान अधिवेशन अन्त्य गरेका थिए। पछि विपक्षी दलहरूले विशेष अधिवेशनको माग गरेबमोजिम वैशाख १३ गते बोलाइएको थियोे। 

१३ गते सुरु भएको अधिवेशन कोरोनाको कारण देखाउँदै १४ गते एमालेले अवरुद्ध गरेको थियो।

१५ गतेको बैठकमा मुख्यमन्त्रीविरुद्ध ल्याइएको अविश्वास प्रस्तावको टुंगो लगाउने कार्यसूची थियो। तर अचनाक जनमोर्चाका सांसद खिमविक्रम शाही हराएपछि स्थगित गरिएको थियो।