खाली अक्सिजन सिलिन्डर फिर्ता नगरे कारबाही 

काठमाडौं– स्वास्थ्य तथा जनसंख्या मन्त्रालयले खाली तथा स्टोर गरी राखिएका अक्सिजन सिलिन्डर अस्पताललाई उपलब्ध गराउन आग्रह गरेको छ। कसैले सिलिन्डर भण्डारण गरे वा फिर्ता नगरे कारबाही गरिने मन्त्रालयको चेतावनी छ।  

मन्त्रालयले सूचना जारी गर्दै कोभिड–१९ का संक्रमितको उपचारका लागि अत्यावश्यक पर्ने अक्सिजन तथा अक्सिजन सिलिण्डर अझै पनि  सरकारको निर्णय विपरित उद्योगहरुमा प्रयोग भइरहेको पाइएकाले ती सिलिन्डर अस्पताललाई उपलब्ध गराउन आग्रह गरेको हो। 

मन्त्रालयले अनुगमनको कमममा धेरै ठूलो मात्रामा अक्सिजन सिलिण्डरहरु खाली रहने वा भरेर भण्डारण गरेर राख्ने गरेको पाइएकोले सम्बन्धित सबै उद्योग–व्यवसायी र सरोकारवालामा त्यस्ता अक्सिजन सिलिण्डरहरु अस्पतालमा उपलब्ध हुने गरी फिर्ता गर्न अनुरोध गरेको हो।

सरकारको यस निर्णयको उल्लंघन गरेको पाइएमा संक्रामक रोग ऐन, २०२० को आधारमा अनुगमन गरी कारवाही गर्ने चेतावनी दिएको छ।