विराटनगर– कोरोना संक्रमित एक महिलाको रक्तश्रावका कारण मृत्यु भएको छ। विराटनगर महानगरपालिका–५ कोचाखालकी ३७ वर्षीया महिलाको रक्तश्राव नरोकिँदा मृत्यु भएको हो।
नोबेल शिक्षण अस्पतालमा उपचारका क्रममा बुधबार राति ९ः३० बजेतिर उनको मृत्यु भएको हो। अस्पतालका प्रबन्धक नारायण दाहालका अनुसार मृतकमा कोरोना संक्रमणसँगै रक्तश्राव भइरहने समस्या थियो।
महिलालाई उपचारका लागि बुधबार दिउँसो ४ः२० बजेतिर अस्पतालको आइसोलेसनमा भर्ना गरिएको थियो। उपचार सफल हुन नसक्दा पाँच घण्टाभित्रै उनको मृत्यु भएको दाहालले बताए।
पाठेघरमा भएको संक्रमणका कारण महिलालाई रक्तश्रावको समस्या देखा परेको पाइएको उनको भनाइ छ। दाहालका अनुसार रक्तश्राव नरोकिएर स्वास्थ्य अवस्था जटिल बन्दै गएपछि कोरोना संक्रमित महिलालाई उपचारका लागि भर्ना गरिएको हो।
प्रकाशित: May 06, 2021| 07:06 बिहीबार, वैशाख २३, २०७८
