सुर्खेत– जुम्ला जाँदै गरेको टिपर कर्णाली नदीमा खसेको छ। दाङको लमहीदेखि सिमेन्ट लिएर जुम्लातर्फ जाँदै गरेको बा ५ ख २१८३ नम्बरको टिपर दैलेखको आठबीस नगरपालिका–४ खोटेसल्लास्थित कर्णाली राजमार्गबाट नदीमा खसेको हो।
टिपर खस्दा चालक र सह–चालक बेपत्ता छन्। उनीहरुको पहिचान खुलेको छैन। बेपत्ताको खोजीका जिल्ला प्रहरी परिचालन गरिएको छ। तर नदीको बहाव बढेका कारण खोजी गर्न गाह्रो भएको छ।
दैलेखका डीएसपी अनुपम श्रेष्ठका अनुसार टिपर मंगलबार राति नदीमा खसेको हुनसक्ने अनुमान गरिएको छ। ‘बिहानमात्रै टिपर नदीको किनारमा देखेपछि थाहा भयो,’ उनले भने। टिपर कर्णाली राजमार्गबाट झण्डै १५० मिटर तल नदीमा खसेको छ।
प्रकाशित: May 05, 2021| 08:27 बुधबार, वैशाख २२, २०७८
