प्रधानमन्त्रीले विश्वासकाे मत लिने संसद् बैठकमा संक्रमित सांसदकाे उपस्थिति के हुने?

काठमाडौं - वैशाख २७ गते प्रतिनिधिसभाको अधिवेशनको बैठक बस्दै छ। बजेट अधिवेशनका लागि नियमित बैठक बस्नुपर्ने समय भए पनि २७ गतेको बैठक भने प्रधानमन्त्रीले प्रतिनिधिसभामा विश्वासको मत लिने प्रयोजनका लागि मात्रै बस्न लागेको हो।

राष्ट्रपतिले प्रतिनिधिसभाको बैठक बोलाउने निर्णय गरेपछि अहिले संसद सचिवालय बैठकको आवश्यक तयारीमा जुटेको छ। कोभिड-१९ को संक्रमण उच्च भइरहेका बेला ठूलो संख्यामा सांसदहरू बैठकमा सहभागी हुनुपर्ने त्यतिकै जोखिम छ।

संसद् सचिवालयले बैठकको पूर्वसन्ध्यामा बैठकमा सहभागी हुने सभामुखसहित सांसदहरूको पीसीआर परीक्षण गर्दैछ। अन्य समयमा बैठक बस्दा पोजिटिभ देखिएका सांसदहरू सहभागी हुन पाउँदैन थिए। तर, २७ गतेको बैठक भने प्रधानमन्त्रीले विश्वासको मत लिने भएकाले सांसदहरू अनिवार्य उपस्थित हुनैपर्छ। महामारीको समयमा पोजिटिभ देखिएका सांसदहरू बैठकमा सहभागी हुन पाउने वा के गर्ने भन्ने अझै टुंगो भने लागिसकेको छैन।

नेकपा एमालेकै वरिष्ठ नेता झलनाथ खनालसहित ६ जना सांसद कोरोना संक्रमित छन्। बुधबार सांसदहरूको पीसीआर परीक्षण हुँदैछ। त्यसमा पनि कोही सांसद संक्रमित पुष्टि हुन सक्छन्।

संघीय सरकारकै पर्यटनमन्त्री भानुभक्त ढकाल र महिला, बालबालिका तथा समाज कल्याण मन्त्री जुली महतोलाई कोरोना संक्रमण भएको छ। तीन दिन अगाडि मन्त्रीहरू ढकाल र महतोलाई संक्रमण पुष्टि भएको हो। 

पूर्वमन्त्री एवम् एमाले सांसद रघुवीर महासेठलाई पनि संक्रमण भएको छ। त्यस्तै एमालेकै सांसद विमला विक र सरिता न्यौपाने पनि संक्रमित छन्। 

संक्रमित सांसदले विश्वासको मत लिने बैठकमा भाग लिन पाउने र मतदानमा सामेल गराउनेबारे अन्योल देखिएको छ।

संसद सचिवालयका प्रवक्ता रोजनाथ पाण्डेय संक्रमित भएका सांसदहरूलाई बैठकमा सहभागी गराउने र मतदानमा सहभागी कसरी गराउने भन्ने विषयमा निर्णय भइनसकेको बताउँछन्। 

‘सभामुखले परामर्श गरिरहनुभएको छ। छलफल पनि चलिरहेको छ। तर, निर्णय केही भएको छैन,’ उनले भने। पोजिटिभ देखिएकालाई उपचारमा नै पठाउनुपर्ने भएकाले के गर्ने भन्ने अन्यौल नै छ। 

बैठकमा सहभागी भएकाले मात्रै मतदान गर्न पाउने भएकाले कसरी व्यवस्थापन गर्ने भन्ने नै दुविधा देखिएको हो। कार्यव्यवस्था परामर्श समितिमा दलहरूसँग छलफल गरेर बैठक अघि नै केही आवश्यक निर्णय हुने संसद सचिवालयले जनाएको छ। वैशाख २७ गते दिउँसो १ बजे प्रतिनिधिसभाको बैठक बस्दै छ।