निषेध आदेशको पहिलो दिन धनुषामा २७८ जना कारबाहीमा

जनकपुरधाम– निषेध आदेशको पहिलो दिन २ सय ७८ जनालाई प्रहरीले पक्राउ गरेको छ। कोरोनाको दोस्रो लहर तिव्र रुपमा फैलिरहेको समयमा स्थानीय प्रशासनले लगाएको निषेध आदेशको क्रममा मास्क नलगाएर हिँड्ने, सवारी साधन लिएर बाहिर निस्केकाहरुलाई कारवाही गरिएको धनुषाका प्रहरी उपरीक्षक प्रकाश रानाभाटले जानकारी दिए । 
उनले पक्राउ परेकाहरुलाई दुई घण्टा होल्डिङमा राखेर छाडेको बताए । त्यस क्रममा मास्क नलगाउने ६७ जनालाई एक सयको दरले कारवाही स्वरुप राजस्व समेत असुल गरेको प्रहरी उपरीक्षक रानाभाटले बताए । 
मंगलबार निषेध आदेशको पहिलो दिन स्थानीय प्रशासनको निर्णय अटेरी गरी चलाएको १ सय ८४ वटा मोटरसाईकल, २३ वटा तिन पाँङ्ग्रे, चार पाँङ्ग्रे गाडी नियन्त्रणमा लिएर साँझमा प्रहरीले छाडेका छन् । 
प्रहरी उपरीक्षक रानाभाटले निषेध आदेशमा भोलीदेखि थप कडाई गर्ने बताए। निषेध आदेशको कार्यान्वयनको लागि जिल्लाभर ६ सय ५० जना प्रहरीलाई तिन सिफ्टमा खटाइएको छ । उनले तरकारी बजारहरुमा भिडभाड देखिएकोले त्यसमा सामाजिक दुरी कायम गराउने तथा जनचेतनाको लागि माइकिंग गरिरहेको बताए।