संसद् छली अध्यादेशबाट शासन चलाउने सरकारको शैली घोर आपत्तिजनक : देउवा

काठमाडौं- नेपाली कांग्रेसका सभापति शेरबहादुर देउवाले सरकारले संसद् छल्ने र अध्यादेश ल्याएरै देश चलाउने कार्यशैली देखाएको भन्दै तीव्र असन्तुष्टि व्यक्त गरेका छन्। मंगलबार प्रेस विज्ञप्ति जारी गर्दै देउवाले वर्तमान सरकारको कार्यशैली घोर आपत्तिजनक भएको समेत बताएका छन्। 

'संसदको बजेट अधिवेशन बोलाउन ढिला भैरहेको अवस्थामा संसदलाई छलेर अध्यादेश मार्फत् शासन चलाउने वर्तमान सरकारको कार्यशैली घोर आपत्तिजनक छ,' देउवाले जारी गरेको विज्ञप्तिमा भनिएको छ, 'संवैधानिक परिषद् सम्बन्धी अध्यादेश लगायत ७ वटा अध्यादेश ल्याउने सरकारको निर्णयको नेपाली कांग्रेस घोर भर्त्सना गर्दछ।'

मंगलबारै सरकारको सिफारिसमा राष्ट्रपति विद्यादेवी भण्डारीले ७ अध्यादेश जारी गरेकी छन्। सरकारले यही वैशाख २७ गतेका लागि प्रनिधिधिसभाको अधिवेशन बोलाएको छ।

यसैबीच कांग्रेस बैठकले प्रधानमन्त्री केपी शर्मा ओलीलाई संसदमा जसरी पनि फेल बनाउने निर्णय गरेको बताइएको छ।