काठमाडौं– कोभिसिल्ड खोप उत्पादन गरिरहेको भारतीय कम्पनी सिरम इन्स्टिच्युट अफ इन्डियाले नेपालले अर्डर गरेको १० लाख डोज खोप उपलब्ध गराउन नसक्ने संकेत गरेको छ।
उक्त कम्पनीसँग खोप किन्न नेपाल सरकारले सम्झौता गर्नुका साथै ८० प्रतिशत अग्रिम भुक्तानी पनि गरिसकेको छ।
स्वास्थ्य मन्त्रालयका अनुसार कम्पनीले अहिलेसम्म खोप पठाउने प्रक्रिया नै सुरु गरेको छैन। सम्झौताअनुसार खोप पठाउन ताकेता गर्दा पनि कम्पनीले आनाकानी गरिरहेको मन्त्रालयको भनाइ छ।
कम्पनीले अहिले खोप दिन नसक्ने बरु नेपालले भुक्तानी गरेको पैसा फिर्ता पठाउने आशय व्यक्त गरेको बताइएको छ। सिरमसँग सरकारले प्रतिखोप ४ अमेरिकी डलरमा किन्ने सम्झौता गरेको छ। यसअघि भारत सरकारले १० लाख डोज कोभिसिल्ड खोप अनुदानमा दिएको थियो।
प्रकाशित: May 04, 2021| 11:12 मंगलबार, वैशाख २१, २०७८
