उपत्यकाको निषेध आदेश एक साता थपियो, थप कडा बनाउने निर्णय

काठमाडौं– काठमाडौं उपत्यकामा जारी निषेध आदेश एक साता थपिएको छ। १६ वैशाखदेखि एक साताका लागि लागू भएको निषेध आदेश अर्को एक साता थपिएको हो। 

आज मंगलबार बसेको काठमाडौं, ललितपुर र भक्तपुरका प्रमुख जिल्ला अधिकारीहरूको संयुक्त बैठकले निषेध आदेश एक साता थप गर्ने निर्णय गरेको हो। योसँगै उपत्यकामा २९ वैशाखसम्म निषेध आदेश लागू हुने भएको छ।

बैठकले निषेध आदेश थप कडा बनाउने निर्णय पनि गरेको छ।

अत्यावश्यक पेशा–व्यवसायका पसल बिहान ९ बजेसम्ममात्र खोल्न दिने र बेलुका खोल्न नदिने निर्णय भएको काठमाडौंका प्रजिअ कालीप्रसाद पराजुलीले बताए। 

सरकारी कार्यालयमा कर्मचारीको संख्या सीमित गर्ने तथा सवारीसाधनको आवतजावत अझ कम गरिने उनले बताए। सञ्चारकर्मीको हकमा सूचना विभाग विभागले जारी गरेको प्रेस पासलाईमात्र मान्यता दिइने उनले बताए।

मिडिया हाउसले न्यूनतम कर्मचारीमात्र राखेर काम गराउनुपर्ने भन्दै उनले आवतजावत गर्नुपर्ने कर्मचारीको विवरण जिल्ला प्रशासन कार्यालयमा पेश गरेर अनुमति लिनुपर्ने बताए।