पर्यटनमन्त्री ढकाललाई कोरोना संक्रमण

काठमाडौं– संस्कृति, पर्यटन तथा नागरिक उड्डयनमन्त्री भानुभक्त ढकाललाई कोरोना भाइरसको संक्रमण आएको छ। 

आफू र श्रीमती इन्दिरा फुयाँललाई पनि आज संक्रमण पुष्टि भएको ढकालले ट्विटरमार्फत जानकारी दिएका छन्। आफूहरुको स्वास्थ्य सामान्य रहेको जानकारी दिँदै उनले सम्पर्कमा आएका सबैलाई सावधानी र सजगता अपनाउन अनुरोध गरेका छन्। 

ढकाल दम्पती अहिले निवासमै आइसोलेसनमा बसेका छन्। यसअघि उःर्जामन्त्री टोपबहादुर रायमाझी र खानेपानीमन्त्री मणि थापालाई पनि कोरोना संक्रमण भएको थियो।

गत वर्ष कोरोना महामारीको पहिलो लहर आउँदा स्वास्थ्यमन्त्री रहेका ढकाल प्रभावकारी काम नगरेको भनेर आलोचित भएका थिए। एक टेलिभिजन सञ्चारकर्मीले ‘कोरोना नियन्त्रणका लागि मन्त्रालयले के गरिरहेको छ ?’ भनेर सोध्दा ‘अहिले बोल्दिनँ, घरमा पाहुना आएका छन्’ भनेर हिँडेपछि ढकाल सामाजिक सञ्जालमा ट्रोल बनेका थिए।