काेराेना जाेखिम बढेपछि म्याग्दीकाे कालीपुलमा होल्डिङ सेन्टर

म्याग्दी - म्याग्दी भित्रिने प्रमुख नाका कालीपुल बसपार्कमा शुक्रबारदेखि होल्डिङ सेन्टर सञ्चालन भएको छ।

फैलिएको दोस्रो लहरको कोरोना भाइरस रोकथामका लागि विदेश र बाहिरी जिल्लाबाट आउने जाने व्यक्तिहरूका लागि होल्डिङ सेन्टर सञ्चालन गरिएको हो । 

जिल्ला प्रशासन कार्यालयको समन्वयमा जिल्लाका सबै स्थानीय तहसँग सहकार्य गरेर कालीपुलको पर्यटक सूचना केन्द्रको भवनमा होल्डिङ सेन्टर तथा नागरिक सहायता कक्ष सञ्चालन गरिएको प्रहरी नायव उपरीक्षक श्यामकुमार राईले बताए। 

होल्डिङ सेन्टरमा बाहिरी जिल्ला र विदेशबाट म्याग्दी आउने नागरिकहरूको विस्तृत विवरणसहितको अभिलेख राख्ने र सम्बन्धित वडाका जनप्रतिनिधिसँग समन्वय गरेर घर पठाउने व्यवस्था मिलाइने छ। 

कोरोना फैलिएका जिल्ला र सहरबाट आउनेहरू सीधै गाउँमा पुगेर क्वारेन्टिनमा नबसी अन्य नागरिकको सम्पर्कमा जाँदा कोरोना फैलने खतरा देखिएपछि कोभिड-१९ जिल्ला संकट व्यवस्थापन केन्द्रले होल्डिङ सेन्टर सञ्चालन गर्ने निर्णय गरेको थियो। रासस