मास्कमा कालोबजारी गर्नेलाई पाँच हजार जरिवाना

काठमाडौं– कोरोना भाइरसको दोस्रो लहर सुरु भएसँगै मास्कको कालोबजारी सुरु भएको छ। विभिन्न औषधि पसल तथा फर्माहरुले मास्कको कालोबजारी सुरु गरेका हुन्। 

वाणिज्य आपूर्ति तथा उपभोक्ता संरक्षण विभागले शुक्रबार गरेको अनुगमनबाट मास्कमा कालोबजारी भइरहेको पुष्टि भएको हो। विभागले शुक्रबार काठमाडौंको ज्ञानेश्वरमा रहेका अनुज स्टोर, यु एण्ड बी स्टोर तथा आरएन स्टोरले मास्कमा कालोबजारी गर्ने गरेको भेटाएको छ। 

ती स्टोरहरुले मास्क खरिदको बिल नराखी बजार मूल्य भन्दा चर्को मूल्यमा बिक्री गर्ने गरेको पाइएपछि विभागले कारवाही गरेको विभागका प्रवक्ता शिवराज सेढाईंले जानकारी दिए। उनका अनुसार ती स्टोरहरुले उपभोक्ता संरक्षण ऐन २०७५को दफा १५ अनुसार बिलबिजक जारी नगरी कारोबार गर्ने गरेको पाइएकाले सोही ऐनको दफा ३१ बमोजिम प्रत्येक फर्मलाई ५ हजार रुपैयाँ जरिवाना समेत गरिएको छ।  

थोक तथा खुद्रा व्यापारीले गत वर्ष पनि कोरोना भाइरस  महामारी सुरु भएपछि मास्कमा चर्को मूल्य लिने गरेका थिए।