आईसीयू र भेन्टिलेटरमा ४४४ जना संक्रमित

काठमाडौं– देशभरका अस्पतालका आईसीयू र भेन्टिलेटरमा ४४४ जना कोरोना संक्रमित रहेको स्वास्थ्य मन्त्रालयले जनाएको छ। यीमध्ये ३३७ जना आईसीयूमा र १०७ जना भेन्टिलेटरमा छन्।

बिहीबार आईसीयूमा रहेका संक्रमितको संख्या सबैभन्दा बढी बागमती प्रदेशमा १५६ जना छ। उक्त प्रदेशका भेन्टिलेटरमा ६७ जना छन्।

प्रदेश १ मा ३६ जना आईसीयू र ६ जना भेन्टिलेटरमा उपचाररत छन् भने प्रदेश २ मा १० आईसीयूमा छन्। गण्डकी प्रदेशमा ५ जना आईसीयू र १ जना भेन्टिलेटरमा उपचाररत छन्। लुम्बिनी प्रदेशमा पनि ८७ जना आईसीयूमा र २१ जना भेन्टिलेटरमा उपचाररत छन्।  

कर्णाली प्रदेशमा २३ आईसीयूमा र ५ जना भेन्टिलेटरमा छन् भने सुदूरपश्चिममा २० जना आईसीयूमा र ७ जना भेन्टिलेटरमा उपचाररत छन्।

पछिल्लो २४ घण्टामा देशभर ३५ जना कोरोना संक्रमितको मृत्यु भएको छ। पछिल्लो समय कोरोना संक्रमणको दर बढेसँगै मृत्युदर पनि बढ्दै गएको छ। कुल संक्रमितमध्ये १.०२ प्रतिशतको मृत्यु भएको मन्त्रालयको तथ्यांक छ।

अहिलेसम्म ३ लाख १७ हजार ५३० जना संक्रमित भएकोमा ३ हजार २४६ जनाको मृत्यु भएको छ।