खाद्यान्न उपलब्ध गराउन उपत्यकाका ४ ठाउँमा सरकारी पसल

काठमाडौं- निषेधाज्ञाको समयमा उपभोक्तालाई मर्का नपरोस् भन्ने उद्देश्यका साथ काठमाडौं उपत्यकाका ४ ठाउँमा सरकारले पसल सञ्चालनमा ल्याएको छ।

सरकारी स्वामित्वको खाद्य व्यवस्था तथा व्यापार कम्पनीले निषेधाज्ञा सुरु भएकै दिन बिहीबारदेखि उपत्यकाका ४ स्थानमा पसल सञ्चालनमा ल्याएको हो।

कम्पनीले सूचनामार्फत् गराएको जानकारीअनुसार काठमाडौंको थापाथली र रामशाह पथमा पसल सञ्चालनमा ल्याइएको छ। ललितपुरको नख्खुमा र भक्तपुरको सुर्यविनायकमा पनि कम्पनीले पसल सञ्चालनमा ल्याएको जानकारी गराएको छ।

थापाथलीमा बिहान ७ देखि १० बजेसम्म र बेलुका ५ देखि ७ बजेसम्म पसल खुला रहने छ। त्यस्तै नख्खुमा बिहान ७ देखि १०, रामशाह पथ र सुर्यविनायकमा बिहान ७ देखि ११ बजेसम्म पसल खुला रहने कम्पनीले जानकारी दिएको छ।

कम्पनीले आफ्नो अनलाइन पोर्टल नेपाल फुड डट जीओभी डट एनपी र चक्रपथभित्र सस्तोडिलमार्फत् अर्डर गरी उपभोग्य वस्तु माग गर्न सकिने जनाएको छ। अलनाइनमार्फत् अर्डर गर्दा ढुवानी निशुल्क रहेको कम्पनीले सूचनामा उल्लेख गरेको छ।

यसअघि गत वर्ष पनि कम्पनीले लकडाउन अवधिमा विभिन्न स्थानमा पसल सञ्चालनमा ल्याउँदै अनलाइनमार्फत् खाद्य सामग्री उपलब्ध गराएको थियो। कम्पनीले विशेष गरी दशैं तथा चाडपर्वलाई लक्षित गर्दै मुलुकका विभिन्न स्थानमा खुद्रा पसल सञ्चालन गराउँदै आएको छ।