मोरङमा एकैदिन तीनजना कोरोना संक्रमितको मृत्यु

विराटनगर– मोरङमा तीनजना कोरोना संक्रमितको मृत्यु भएको छ। मृत्यु हुनेमा झापा, सुनसरी र सिरहाका छन्।  

झापाको अर्जुनधारा–६ का ३५ वर्षीय पुरुषको बिहीबार बिहान ६ बजेतिर विराटनगरस्थित कोसी अस्पताल कोभिड–१९ उपचार केन्द्रमा मृत्यु भएको छ। कोरोना पुष्टि भएपछि वैशाख ४ गते उपचारका लागि अस्पताल भर्ना गरिएका मृतकमा श्वासप्रश्वास र ज्वरोको समस्या रहेको कोभिड अस्पतालका सूचना अधिकारी अनुपम राजवंशीले बताए। 

नोबेल शिक्षण अस्पताल विराटनगरमा भर्ना गरिएका सिरहाको गोलबजार–१२ का ४८ वर्षीय पुरुषको पनि मृत्यु भएको छ। भर्ना गरिएको दुई घण्टा पनि पुग्न नपाउँदै उनको मृत्यु भएको अस्पतालका प्रबन्धक नारायण दाहालले जानकारी दिए।

उनका अनुसार राति १२ः२२ बजेतिर सङ्क्रमितको मृत्यु भएको हो। उनलाई उपचारका लागि बुधबार राति १०ः३० बजेतिर अस्पताल ल्याइएको थियो। दाहालका अनुसार मृतकमा निमोनियाको पुरानै समस्या थियो। 

उता बूढीगंगास्थित विराट शिक्षण अस्पतालमा सुनसरीको इटहरी–४ की ६२ वर्षीया महिलाको बुधबार राति १०ः४० बजेतिर मृत्यु भएको छ। उपचारका लागि विराटमा भर्ना गरिएको केही बेरमै मृत्यु भएको विराटका कोभिड–१९ अस्पताल इन्चार्ज सुनिल देवले बताए।

देवका अनुसार मृतकमा श्वासप्रश्वास र निमोनियाको समस्या थियो।  उपचारका लागि आइसोलेसनमा भर्ना गर्न नपाउँदै वृद्धा महिलाको मृत्यु भएको उनले बताए।