कोरोना संक्रमितले भरियो सेती अस्पताल, आकस्मिकबाहेकका शल्यक्रिया बन्द

धनगढी- सेती प्रादेशिक अस्पतालमा आकस्मिकबाहेकका सबै शल्यक्रिया बन्द गरिने भएको छ। बुधबार अस्पतालले सूचना जारी गर्दै बिहीबारदेखि आकस्मिकबाहेकका सबै शल्यक्रिया बन्द गर्ने निर्णय भएको जानकारी दिएको हो। 

अस्पतालका मेडिकल सुपरिन्टेन्डेन्ट डा हेमराज पाण्डेयले जारी गरेको सूचनामा कैलालीमा निषेध आदेश जारी भएको र स्वास्थ्य तथा जनसंख्या मन्त्रालयको निर्देशनअनुसार इमरजेन्सीबाहेकका सर्जरी सेवा बन्द गरिएको उल्लेख छ। 

कोभिड–१९ को दोश्रो लहर कैलालीमा पनि तीव्र गतिमा फैलिरहेकोले प्रतिकूल अवस्थामा सकेसम्म अस्पतालमा नआउन र आउनैपर्ने अवस्था सिर्जना भए चिकित्सकसँग परामर्श गरेर आउन सूचनामा भनिएको छ। 

बुधबार धनगढीस्थित सेती प्रादेशिक अस्पतालको प्रयोगशालामा भएको परीक्षणमा २ सय २७ जनामा कोरोना संक्रमण पुष्टि भएको छ। अस्पतालका सूचना अधिकारी दीलिपकुमार श्रेष्ठका अनुसार पछिल्लो २४ घण्टामा ३ सय ७० नमुना जाँच गर्दा२२७ जनाको रिपोर्ट पोजेटिभ आएको हो। 

सेती प्रादेशिक अस्पतालमा हाल ५२ जना कोरोना संक्रमितको उपचार भइरहेको छ। श्रेष्ठका अनुसार अस्पतालमा ३ जना भेन्टिलेटरमा, ८ जनामा आइसियूमा, २३ जना अक्सिजन सपोर्टमा र १८ जनालाई साधारण बेडमा राखेर उपचार भइरहेको छ।