संक्रमण दर वृद्धिमा नेपाल विश्वमै पहिलो, सातामै २२८ प्रतिशत वृद्धि

काठमाडौं– कोरोना भाइरस संक्रमणको दर फैलने पहिलो नम्बरमा नेपाल रहेको स्वास्थ्य तथा जनसंख्या मन्त्रालयले जनाएको छ। 

मन्त्रालयको नियमित पत्रकार सम्मेलनमा संक्रामक रोग विशेषज्ञ डा. अर्चना श्रेष्ठले विश्वका सबै देशभन्दा नेपालमा छिटो गतिमा संक्रमण फैलिरहेको जानकारी दिइन्। 

उनका अनुसार पछिल्लो एक हप्तामा संक्रमण दर २२८ प्रतिशतले बढेको छ। नेपाल भारतभन्दा एक महिना पछाडि थियो। तर नेपालले पनि भारतको जस्तै मोड लिनेवाला छ। 

‘संक्रमितको संख्यामात्रै होइन, टेस्ट पोजेटिभको दर पनि बढेको छ,’ उनले भनिन्, ‘नेपाल र भारतको तुलना गर्दा भारतको भन्दा धेरै पोजेटिभ रेट बढेको छ। नेपालमा अब भारतमा भन्दा धेरै संक्रमणको दर बढेको छ र मृत्युको संख्या पनि बढेको छ। एक वर्षमा जति संक्रमित देख्यौं, यही दरमा बढ्दै गएमा एक वर्षमा देखेको संक्रमितको संख्या अबको तीन महिनाभित्रमा नै देख्नेछौं।’

यही गतिमा संक्रमणको दर बढ्दै गएमा दैनिक १५० जना गुमाउने अवस्थामा नेपाल पुगेको उनले बताइन्। ‘हामी गम्भिर परिस्थितिमा आइपुगेका छौं,’ उनले भनिन्।