२४ घण्टायता पर्सामा ५ कोरोना संक्रमितको मृत्यु

पर्सा- पछिल्लो २४ घण्टायता पर्सा मात्रै ५ जना कोरोना संक्रमितको मृत्यु भएको छ। वीरगञ्जस्थित नारायणी अस्पतालमा उपचारको क्रममा उनीहरूको मृत्यु भएको हो। 

मृत्यु हुनेमा वीरगञ्ज महानगरपालिका-२७ की ६० वर्षीय महिला र रौतहट राजवारा निवासी ५० वर्षीया महिला छन्। उनीहरू दुवै जना बुधबार नै अस्पताल भर्ना भएका थिए। 

यसैगरी, वीरगञ्ज महानगरपालिका-७ रामटोल निवासी ४५ वर्षीय पुरुषको पनि बुधबार नै मृत्यु भएको छ। उनको केही बेर अगाडि उपचारको क्रममा मृत्यु भएको नारायणी अस्पतालले जानकारी दिएको छ।

यस्तै गएराति उपचारको क्रममा दुई कोरोना संक्रमितको ज्यान गएको थियो। मृत्यु हुनेमा बाराको सुवर्ण गाउँपालिका-७ की ३० वर्षीया महिला र विसवरिया गाउँपालिका-४ धनगढका ४३ वर्षीय पुरूष रहेको नारायणी अस्पतालका कोभिड संयोजक डा. सरोज रोशन दासले बताएका थिए। दुवैको मृत्यु आरआरडीएस, सीवियर न्यूमोनियाले भएको चिकित्सक डा. दासले बताए। 

यो सहित पर्सामा गएको ७२ घण्टामा वीरगञ्जस्थित नारायणी अस्पतालमा उपचाररत ११ जना कोरोना संक्रमितको मृत्यु भइसकेको छ।

कोरोनाको दोस्रो लहर सुरु भएसँगै पर्सामा मृत्यु हुनेको संख्या बढ्दै गएको छ। पर्सामा सोमबार ३ जना, मंगलबार ४ जना र बुधबार अहिलेसम्म ४ जना गरी ७२ घण्टामा ११ जना कोराना संक्रमितले ज्यान गुमाएका छन्।