कर्णालीका ३ मन्त्रीले लिए शपथ

सुर्खेत- कर्णाली प्रदेशका तीन जना मन्त्रीले बुधबार पद तथा गोपनीयताको शपथ लिएका छन्। 

भौतिक पूर्वाधार विकास मन्त्री अमरबहादुर थापा, उद्योग, पर्यटन, वन तथा वातावरणमन्त्री नन्दसिंह बुढा र भूमि, व्यवस्था, कृषि तथा सहकारी मन्त्री कुर्मराज शाहीले शपथ लिएका हुन्। नवनियुक्त मन्त्रीलाई कर्णाली प्रदेश प्रमुख गोविन्दप्रसाद कलौनीले शपथ खुवाएका थिए।

वैशाख ३ गते कर्णाली प्रदेशका मुख्यमन्त्री महेन्द्रबहादुर शाहीलाई विश्वासको मत दिएका उनीहरूको वैशाख १३ गते सांसद पद गुमिसकेको छ।

नेकपा एमालेको ह्विप विपरीत फ्लोर क्रस गरी मुख्यमन्त्री शाहीलाई विश्वासको मत दिएका उनीहरूलाई एमालेले कारबाही गरी सांसदबाट हटाएको हो। फ्लोर क्रस गरेको दुई दिनमै माधव कुमार नेपाल समूहका उनीहरूले मन्त्री पद पाएका हुन्।

फ्लोर क्रसलगत्तै मन्त्री बनेका उनीहरुलाई सांसद पद गुमेपछि पुनः नियुक्त गरिएको हो। सांसद पद गुमिसकेका कारण उनीहरू ६ महिना मात्रै मन्त्री हुन पाउने कानुनी प्रावधान छ।