भारतमा कोरोनाबाट मर्नेको संख्या दुई लाख नाघ्यो

काठमाडौं– भारतमा कोरोना महामारीले दिनदिनै भयावह रुप लिइरहेको छ। पछिल्लो २४ घण्टामा त्यहाँ ३ लाख ६० हजारभन्दा बढी संक्रमित थपिएका छन् भने ३ हजार २९३ जनाको ज्यान गएको छ। 

अहिलेसम्म त्यहाँ १ करोड ७९ लाखलाई कोरोना संक्रमण भइसकेको छ। यीमध्ये २ लाख १ हजार १८ जनाको मृत्यु भएको छ। 

१ अर्ब ४० करोड जनसंख्या रहेको भारत कोरोनाबाट २ लाखभन्दा बढी मानिस मर्ने चारजवटा देशको सूचीमा परेको छ। भारतबाहेक अमेरिका, ब्राजिल र मेक्सिकोमा दुई लाखभन्दा बढी संक्रमितको मृत्यु भएको छ। 

भारतमा कोरोनाबाट पहिलो मृत्यु २१ मार्च २०२० मा कर्नाटकमा भएको थियो। पाँच महिनापछि यो संख्या ५० हजार पुग्यो। गत अक्टोबरसम्ममा मृतकको संख्या १ लाख पुगेको थियो। त्यसको तीन महिनापछि जनवरीमा मृतकको संख्या डेढ लाख पुग्यो। 

मध्य मार्चसम्म मृतकको संख्या खासै नबढेकोमा त्यसपछि पनि तीव्र गतिमा मृत्यु हुन थाल्यो र दैनिक दुई हजारभन्दा बढीको ज्यान जान थाल्यो। मंगलबार यो आँकडा पनि तीन हजार नाघेको छ।