लागुऔषध किन्न टेलिकमको तार चाेरी, दुईजना पक्राउ

झापा – मेचीनगरमा इन्टरनेट र टेलिफोनको तार चोरी गरेको आरोपमा एक किशोरसहित दुई व्यक्ति पक्राउ परेका छन्। 

मेचीनगर नगरपालिका–७ को नयाँ बसपार्क क्षेत्रमा नेपाल टेलिकमको केबल तार चोरी भएपछि विगत एक सातादेखि पूर्वीनाका काँकडभिट्टाका १५० टेलिफोन अवरुद्ध भएका छन् भने इन्टरनेट सेवा बन्द छ।

इलाका प्रहरी कार्यालय काँकडभिट्टाका प्रहरी नायव उपरीक्षक सुनिल दाहालका अनुसार नेपाल टेलिकमको केबल तार चोरी गर्ने गिरोहका दुईजना भारतको पानीट्याङ्कीबाट पक्राउ परेका हुन्। 

पक्राउ पर्नेमा मेचीनगर–६ का १६ वर्षीय एक किशोर र भारत पानीट्याङ्कीका २१ वर्षीय सञ्जु वर्मन छन्। आइतबार राति पानीट्याङ्कीबाट पक्राउ गरेर दुवैलाई हाल इप्रका काँकडभिट्टाको हिरासतमा राखिएको छ। 

तार चोरीमा लामो समयदेखि गिरोह सक्रिय रहेको हुँदा अरू व्यक्तिहरूको खोजी कार्य तीव्र पारिएको दाहालले बताए। शनिबार राति काँकडभिट्टामा फेरि ७५ मिटर तार चोरी भएपछि प्रहरीलाई अभियुक्तको खोजतलासका लागि अनुरोध गरिएको नेपाल टेलिकम कार्यालय काँकरभिट्टाका प्रमुख श्यामकुमार अधिकारीले बताए। 

गत माघयता मेचीनगरमा ३०० मिटरभन्दा बढी केबल तार चोरी भइसकेको छ। इँटाभट्टा र धुलाबारी क्षेत्रमा समेत विगतदेखि केबल तार चोरीका घटना भइरहेका छन्। 

पक्राउ परेका दुवैजना लागुऔषध सेवनकर्ता रहेको प्रहरीको भनाइ छ। गिरोहले रातमा तार चोरी गरेर भारतको पानीट्याङ्की बजारमा लगी बिक्री गर्दै आएको पाइएको छ।

कूलतमा फँसेका युवाहरू तार चोरीमा संलग्न हुने गरेको र त्यही धन्दाबाट आर्जित रकमले लागुऔषध खरिद गरेको पाइएको हुँदा अभिभावकसमेत छोराछोरीको आचरण निगरानीमा लाग्नु पर्ने देखिएको छ। रासस