'आन्तरिक उडान स्थगनबारे एक–दुई दिनमै निर्णय हुन्छ'

काठमाडौं- कोरोना संक्रमण बढेको भन्दै काठमाडौं उपत्यकाका जिल्ला प्रशासन कार्यालयले १६ वैशाखदेखि अत्यावश्यकबाहेक निजी तथा सार्वजनिक सवारी साधनमा रोक लगाए। तर हवाइ उडानबारे केही निर्णय हुन सकेन। 

सामाजिक सञ्जालमा ‘हामी कोरोना ओसार्छौं, आउनुस् सँगै मरौं’ जस्ता व्यङ्ग्यात्मक प्रतिक्रियासहित एयरलाइन्सहरूको आलोचना भइरहेका बेला प्रशासनले आन्तरिक उडान स्थगनबारे कुनै निर्णय नगरेपछि यसबारे सबैको चासो बढेको छ।

‘उडानबारे छलफल नभएको होइन। तर, सरोकारवालासँग कुराकानी गरेपछि मात्र निर्णय लिने तयारी भएको छ,’ नागरिक उड्डयन प्राधिकरणका एक उच्च कर्मचारीले नेपाल समयसँग भने, ‘यसमा जिल्लाका सिडीओहरूले मात्र निर्णय गरेर हुँदैन। एकपटक एयरलाइन्सहरुसँगै बसेर छलफल हुनपर्छ।’

दैनिक सरदर १२ हजार यात्रु उड्ने आन्तरिक उडानबारे एक–दुई दिनभित्रै निर्णय गरिने जानकारी उनले दिए।

उता यातायात व्यवसायीहरूले भने निषेध आदेशको अवधिमा हवाई उडान पनि रोक्न माग गरेका छन्। आन्तरिक उडान नरोके आफूहरूले पनि सार्वजनिक सवारीका साधन सञ्चालन गर्ने चेतावनी व्यवसायीले दिएका छन्।

नेपाल यातायात व्यवसायी राष्ट्रिय महासंघका महासचिव सरोज सिटौलाले यातायात व्यवसायीहरूलाई सरकारले नै विभेद गरेको आरोप लगाए। 'सरकारले विभेदपूर्ण व्यवहार गर्न खोजेको छ। हवाई यात्रा गर्दा कोरोना नसर्ने तर गाडीमा चाहिँ सर्ने भन्ने हुँदैन। कोरोना नियन्त्रण गर्ने हो भने त सबै क्षेत्र बन्द गर्नुपर्‍यो नि! कुनै व्यवसाय बन्द गर्ने कुनै खोल्ने गर्न पाइँदैन,' महासचिव सिटौलाले भने।