राष्ट्रिय सभा सदस्य उपनिर्वाचनका लागि हेटौंडामा कार्यालय 

काठमाडौं– राष्ट्रिय सभामा प्रतिनिधित्व गर्ने सदस्यको रिक्त एक पदका लागि हुने निर्वाचनका लागि निर्वाचन अधिकृतको कार्यालय हेटौंडा तोकिएको छ।

मतदान आगामी जेठ ६ गते बिहान ९ देखि ३ बजेसम्मका हुनेसहितको कार्यतालिका निर्वाचन आयोगले शुक्रबार स्वीकृत गरेको हो।

आयोगको शुक्रबार बसेको बैठकले निर्वाचनलाई सुव्यवस्थित रूपमा सम्पन्न गर्न निर्वाचनपूर्व, निर्वाचनका समयमा र निर्वाचनपछि गर्नुपर्ने क्रियाकलाप समेटिएको निर्वाचन कार्यतालिका स्वीकृत गरेको छ।

आयोगको बैठकपछि जारी विज्ञप्तिमा उल्लेख छ, ‘बागमती प्रदेशको राजधानी रहेको मकवानपुर जिल्लाको सदरमुकाम हेटौंडास्थित प्रदेश निर्वाचन कार्यालयमा निर्वाचन अधिकृतको कार्यालय स्थापना गर्ने निर्णय भएको छ।’

राष्ट्रिय सभा सदस्य निर्वाचन ऐन, २०७५ को दफा ७ बमोजिम निर्वाचन अधिकृतको पदमा नियुक्त गर्न न्याय परिषद्को परामर्शमा दुई जना (एकजना जगेडा समेत) जिल्ला न्यायाधीशको नामावली माग गरी नेपाल सरकार, कानून, न्याय तथा संसदीय मामिला मन्त्रालयमा लेखी पठाउने निर्णय गरेको आयोगका प्रवक्ता राजकुमार श्रेष्ठले जारी गरेका विज्ञप्तिमा उल्लेख छ।