कोरोना संक्रमणबाट दुई पत्रकारको निधन

काठमाडौं– कोरोना महामारीको दोस्रो लहर फैलिएपछि संक्रमणबाट दुई पत्रकारको निधन भएको छ।

नेपाल पत्रकार महासंघका अनुसार महासंघ दाङ शाखाका सदस्य दामोदर अधिकारी र झापा शाखाका सदस्य कमल मिश्रको निधन भएको हो। उनीहरु दुवैको कोरोना संक्रमण भई उपचारका क्रममा निधन भएको महासंघले जनाएको छ।

दाङको घाराही–१७ निवासी ४१ वर्षीय पत्रकार अधिकारीको काठमाडौंमा उपचारका क्रममा वैशाख ७ गते मंगलबार निधन भएको थियो।  

झापाबाट पत्रकािरता सुरु गरी हाल काठमाडौंमा पत्रकारिता गरिरहेका मिश्रको वैशाख १ गते राति ४९ वर्षको उमेरमा काठमाडौंस्थित टेकु अस्पतालमा उपचारका क्रममा निधन भएको महासंघको विज्ञप्तिमा उल्लेख छ।

महासंघले पत्रकारद्वय अधिकारी र मिश्रप्रति श्रद्धाञ्जलि अर्पण गर्दै दिवंगत आत्माको चिरशान्तिको कामना गरेको छ।

कोरोनाकै कारण यसअघि ६ जना पत्रकारको निधन भएको थियो भने चार सयभन्दा बढी संक्रमित भएका थिए।