उपद्रो गर्दा पनि सम्झाइबुझाइ गर्ने प्रयासमा छौं, अब पार्टीमा अराजकता चल्दैन : प्रधानमन्त्री ओली

काठमाडौं - प्रधानमन्त्री केपी शर्मा ओलीले आफूहरूमाथि संगठित हमला भएको बताएका छन्। 

आज बल्खुस्थित पार्टी कार्यालय भवनको शिलान्यास गर्दै ओलीले त्यस हमलालाई असफल पारेको बताएका हुन्। 

‘संगठित हमलाको सिलसिला कति निर्मम थियो, साधारण सदस्यसमेत नरहने गरी तथाकथित कारबाही गरियो,’ उनले भने, ‘सडकबाटै उद्घोष गरियो, केपी ओलीलाई सिध्याइयो।’

संसदीय इतिहासमा यति साह्रो अराजक कतै नदेखिएको भन्दै उनले भने, ‘हामीलाई पार्टीविहीन अवस्थामा लान खोजिएको थियो, त्यसलाई असफल पारियो।’

एमाले अध्यक्षसमेत रहेका ओलीले आन्दोलन ध्वस्त पार्ने निकृष्ट प्रयास भएको बताए। ‘त्यस्तो स्थितिलाई पार गरेर आएका छौं, हाम्रो पार्टी कब्जा गर्ने, हामीलाई माटामा मिलाइदिने भन्ने थियो,’ उनले भने, ‘पार्टीका नाउमा पार्टी भित्रैबाट प्रहार गर्ने काम भए।’ 

माधव नेपाललाई लक्षित गर्दै ओलीले ‘फ्लोर क्रस’ गरेर कम्युनिष्ट पार्टीलाई कमजोर पारेकोमा गर्व गर्ने प्रवृत्तिविरुद्ध आफूहरू जुधिरहेको बताए। 

‘यति उपद्रो गर्दा पनि हामी सम्झाइबुझाइ गर्ने प्रयासमा छौं, भरसक पार्टीमा क्षति नहोस् भन्नेमा छौं,’ उनी भन्छन्, ‘पार्टीमा गुट, अराजकता, अनुशासनहीनता चल्दैन, अब त्यससँग सम्झौता पनि गर्न सक्दैनौं।’