ओली र नेपालबीचको वार्ता सकारात्मक !

काठमाडौं- नेकपा एमालेका अध्यक्ष केपी शर्मा ओली र वरिष्ठ नेता माधव नेपालबीच लामो समयपछि वार्ता भएको छ।

काठमाडौंको नक्सालस्थित होटेल मेरियटमा भएको करिब २ घण्टा लामो वार्तामा के के विषयमा छलफल भयो भन्ने सार्वजनिक भएको छैन।

तर छलफलमा सहभागी अन्य नेताहरुले दुई नेताबीचको वार्ता सकारात्मक भएको बताएका छन्। वार्तापछि प्रधानमन्त्रीका आर्थिक सल्लाहकार मोतीलाल दुगडले दुवै नेता प्रफुल्ल मुद्रामा बाहिरिएकाले वार्ता सकारात्मक भएको हुन सक्ने बताए।

वार्ताबाट बाहिरिएका दुवै नेताले कुनै प्रतिक्रिया भने दिएनन्। नेता नेपालले ‘साथीहरुसँग’ छलफल गरेपछि प्रतिक्रिया दिने बताएका छन्।

विधानविपरीत ओलीले पार्टी कब्जा गरेको आरोप नेपाल पक्षले लगाउँदै आएको छ। नेपाल पक्षमाथि भने पार्टी विभाजन गर्ने उद्देश्यले काम गर्न थालेको आरोप ओली पक्षले लगाउँदै आएको छ। 

बुधबार मात्र ओलीले फागुन २८ पछि गरेका सबै काम खारेज गर्न माग गर्दै नेपाल पक्ष सर्वोच्च पुगेको थियो। तर उसले दायर गरेको रिट भने दर्ता भएको छैन। 

बुधबार दिउँसो नेपाल पक्षका नेता योगेश भट्टराईले ओलीसँग भेट गरी वार्ताबाट अघि बढ्न सुझाव दिएका थिए।
लामो समयको रस्साकस्सीपछि भएको ओली र नेपालबीचको वार्तालाई महत्वका साथ हेरिएको छ।